Respýblıkaǵa eńbegi sińgen ujym, Búkilodaqtyq baıqaýdyń laýreaty atanǵan Memlekettik hor kapellasy Jambyl atyndaǵy Qazaq memlekettik fılarmonııasynyń quramyna 1935 jyly kirdi.
Alǵashqy ýaqytta kompozıtor Dmıtrıı Masýsınniń basqarýymen bul ujym kishigirim, aralas hor bolyp qurylsa, qazirgi ýaqytta Hor kapellasy memlekettik dárejege kóterildi. Búgingi tańda kapellanyń repetýaryna horǵa óńdelip túsirilgen halyq ánderi, sondaı-aq shyǵarmalardyń iri túrleri – sıýıta, poema, kantata jáne oratorııalar engen. Bir sózben aıtqanda, Baqytjan Baıqadamov atyndaǵy Memlekettik hor kapellasynyń repertýarynda shetel klassıkteri men elimizdiń sańlaq kompozıtorlary M.Tólebaev, B. Baıqadamov, E. Rahmadıev, Ǵ.Jubanova, M.Saǵatov, S.Muhamedjanov, Q.Qojamııarov, M.Mańǵytaev, J.Tursynbaevtyń shyǵarmalary berik oryn alǵan. Osyndaı shyǵarmashylyq-kórkemdik áleýeti bıik kapella ujymyna Qazaqstanda ǵana emes, shetel sahnalarynda da óner kórsetip keledi.
1936 jyly Qazaqstannyń Máskeýde ótken mádenı onkúndiginde 300 adamdyq hor tabysty óner kórsetti. Al, 1939 jyly aqpan aıynda respýblıka úkimetiniń qaýlysymen atalǵan hor ujymy qazaqtyń Memlekettik hor kapellasy bolyp qaıta quryldy. Alǵashqy kezeńde hor kapellasyna Borıs Lebedev, Latıf Hamıdı, Borıs Orlov, Baqytjan Baıqadamov, Galına Vınogradovalar jetekshilik etti. 1959 jyldan 1991 jylǵa deıin hor kapellasyn KSRO halyq ártisi, Memlekettik syılyqtyń laýreaty, professor Anatolıı Vasılevıch Molodov basqardy. Al, qazirgi ýaqytta kapellanyń kórkemdik jetekshisi jáne bas dırıjeri bolyp Qazaqstannyń eńbek sińirgen qaıratkeri Beıimbet Demeýov qyzmet atqaryp keledi.
Jeltoqsan aıynyń 4 saǵat saǵat 19.00-de Jambyl atyndaǵy Qazaq memlekettik fılarmonııasynda qurylǵanyna 80 jyl tolyp otyrǵan B.Baıqadamov atyndaǵy hor kapellasynyń konserti ótedi. Bas dırıjeri - QR Eńbek sińirgen qaıratkeri Beıimbet Demeýov. Konsertke QR Eńbek sińirgen ártisi, Memlekettik syılyqtyń laýreaty, «Astana Opera» teatrynyń ánshisi M.Muhamedqyzy, Qazaqstannyń halyq ártisi A.Qorazbaev, Qazaqstannyń eńbek sińirgen ártisi M.Musabaev, Abaı atyndaǵy Opera jáne balet teatrynyń ánshisi, QR eńbek sińirgen qaıratkeri G.Dáýirbaeva, QR Mádenıet qaıratkeri Q. Ádilov, Halyqaralyq baıqaýlardyń laýreattary T.Pazylaqyn, R.Jarmaǵambetov, A.Ǵabdıev, Á.Áýbákirova, F.Kúbıev qatysady.
Konsertmeısteri – halyqaralyq baıqaýlarynyń laýreaty A. Qulsháripov.
Baǵdarlamada qazaq jáne shetel kompozıtorlarynyń shyǵarmalary oryndalady.
ALMATY